Экологиялық факторлардың ҳәм инсан саламатлығына кери тәсири үйренилди

22-23-апрель күнлери Ташкент педиатрия медицина институты Нөкис филиалында өткерилген «Экологиялық факторлар ҳәм инсан саламатлығы» атамасындағы халықаралық илимий семинарда ҳәзирги дәўирдеги глобал экологиялық машқалалар ҳәм оларды шешиў жоллары, Арал бойында жасаўшы халықтың саламатлығына тәсир етиўши факторлар ҳәм Аралбойы халқының регионаллық кеселликлериниң әҳмийетли машқалалары ҳаққында сөз болды.

Семинарда Санкт-Петербург мамлекетлик педиатрия медицина университети профессоры Юрий Александрович Станиславович ҳәм усы университеттиң кафедра баслыгы профессор Заболотский Дмитрий Владиславович (Россия), Вена медицина университетинин кафедра баслыгы м.и.д профессор Hanns Michael Moshshammer (Австия), Ахмет Яссаўий атындағы Халықаралық Қазақ-Түрк университетиниң кафедра баслығы Бабаева Кумисай ҳәм усы университеттиң кафедра баслығы м.и.к Нусқабаева Гулназ (Қазақстан), сондай-ақ, Корё университетинен келген Jae Wook Choi (Қубла Корея) лар жоқарыдағы мәселелер бойынша баянатлар жасап, елимиздеги экологиялық жағдай нәтийжесинде пайда болған ҳәм келип шығыўы мүмкин болған кеселликлердиң алдын алыў илажлары ҳаққында өзлериниң баҳалы пикирлерин билдирди. Сондай-ақ, сырт елли профессорлар мәмлекетимизде Арал теңизиниң қурып қалған ултанында  жасыл тоғайлық жаратыў ҳәм сол арқалы экологиялық жағдайды жақсылаў мақсетинде алып барылып атырған кең көлемли жумысларға жоқары баҳа берди.