Өзбекстан мектеплеринде төлемли хызмет енгизиледи

Төлемли хызметлер ушын төлем кем тәмийинленген шаңарақлардың перзентлери ушын улыўма баҳаның 50 проценти муғдарында белгиленеди.

Ҳүкимет қарары менен Өзбекстан Республикасы Халық билимлендириў министрлиги системасындағы улыўма орта билимлендириў мәкемелеринде төлемли билим бериў хызметлерин көрсетиў тәртиби ҳаққындағы реже тастыйықланды. Режеге муўапық, төлемли билим бериў хызметлери зәрүр материаллық-техникалық базасы ҳәм тийисли педагог хызметкерлерге ийе болған мектеплерде шөлкемлестириледи.

Төлемли билим бериў хызметлери шәртнама тийкарында көрсетиледи.

Бул хызметлерге оқыўшыларды мәжбүрий тартыў қадаған етиледи.

Төлемли хызметлер ушын төлем кем тәмийинленген шаңарақлар ушын улыўма баҳаның 50 проценти муғдарында белгиленеди.

Бир топарда сабаққа қатнасыўшылардың саны 35 тен артыўы мүмкин емес.

Төлемли хызметлерден түсетуғын қаржының 50 процентинен кем болмаған бөлеги педагог-оқытыўшыларға бериледи.

Төлемли хызметлер ушын ҳақы банклер арқалы төленеди, төлемди мектепте әмелге асырыў қадаған етиледи.

Ҳүжжет ҳаққындағы толық мағлыўмат пенен www.lex.uz сайты арқалы танысыў мүмкин.

Дерек: Қарақалпақстан хабар агентлиги